भडगाव तहसीलदार यांना धनगर समाजाच्यावतीने निवेदन.

भडगाव तहसीलदार यांना धनगर समाजाच्यावतीने निवेदन

भडगाव तालुका प्रतिनिधी : यशकुमार पाटील भडगाव : शहरातील धनगर समाज बांधवातर्फे धनगर आरक्षण अंमलबजावणीसाठी तहसील कार्यालय समोर येळकोट येळकोट जय मल्हार यासह विविध घोषणा देत धरणे आंदोलन करण्यात आले. व तहसीलदार शितल सोलाट यांना आपल्या मागणीचे निवेदन देण्यात आले. महाराष्ट्रात धनगर जमातीची ७० वर्षापासून घटनेमध्ये असलेल्या अनुसूचित जमातीच्या आरक्षणाची अंमलबजावणीची मागणी आहे. भारत सरकारच्या दरवर्षी प्रसिध्द होणाऱ्या राजपत्रात अनुसूचित जमातीच्या यादीत अ.क्र. ३६ वर धनगर असा स्पष्ट उल्लेख आहे. गेल्या ७० वर्षापासून धनगर जमात आपल्या संवैधानिक हक्कापासून वंचित आहे.

महाराष्ट्र शासनाने शासन निर्णय काढून धनगर जमातीस अनुसूचित जमातीचे दाखले त्वरीत द्यावेत या मागणीसाठी आज संपूर्ण महाराष्ट्रात आंदोलन करण्यात येत आहे. सदर मागणीसाठी पंढरपूर, लातूर, नेवासा येथे गेल्या १४ दिवसांपासून धनगर समाज बांधव आमरण उपोषणास बसलेले आहेत. त्या उपोषणाकत्यांची शासनाने त्वरीत दखल घेऊन धनगर जमातीच्या अनु. जमातीच्या आरक्षणाची अंमलबजावणी या विधानसभेच्या निवडणूकीपूर्वी करण्यात यावी व तात्काळ एस. टी. प्रमाणपत्र देण्यात यावे. अन्यथा भडगाव तालुका सकल धनगर समाज तर्फे उपोषणाचा इशारा देण्यात आला. यावेळी निवेदन देताना मल्हारसेना जिल्हा अध्यक्ष संदिप मनोरे, डॉ. गणेश अहिरे, मल्हारसेना तालुका अध्यक्ष वाल्मीक कंखरे, मल्हारसेना संपर्क प्रमुख आकाश कंखरे, मल्हारसेना शहर अध्यक्ष निलेश धनगर, उत्तम धनगर, भगवान धनगर, ईश्वर कंखरे, अरुण कंखरे, नाना धनगर, श्याम मुसांडे, भाऊसाहेब मोटे, अनिल धनगर, मनोज धनगर, यासह धनगर समाज बांधव मोठ्या संख्येने उपस्थित होते.