दिनांक १२.५.२०२५ रोजी बुध्द पौर्णिमा निमित्ताने निसर्ग अनुभवाच्या माध्यमातून यावल वनविभागा कडन एकुण ३९ मचान , यावल वनविभागा मार्फत तयार करण्यात आलेले आहेत.

दिनांक १२.५.२०२५ रोजी बुध्द पौर्णिमा निमित्त यावल वनविभागाचे उप वनसंरक्षक जमीर शेख, व सहाय्यक वनसंरक्षक चोपडा प्रथमेश हाडपे यांच्या संकल्पनेतून यावल वनविभागातील चोपडा वनक्षेत्र पासुन ते रावेर वनक्षेत्र पर्यंत ठिकठिकाणी जंगल भागात प्राणी गणनेसाठी मचान तयार करण्यात आलेले आहेत. यावल वनविभागात चोपडा वनक्षेत्रात ०३ मचान, वैजापुर वनक्षेत्रात ०७ मचान, अडावद वनक्षेत्रात ०५ मचान, देवझिरी वनक्षेत्रात ०५ मचान, यावल पुर्व वनक्षेत्रात ०६ मचान, यावल पश्चिम वनक्षेत्रात ०५ मचान तर रावेर वनक्षेत्रात ८ मचान असे एकुण ३९ मचान यावल वनविभागात तयार करण्यात आलेले आहेत. सदर मचाण वर ३ ते ४ व्यक्ती एका वेळेस बसु शकतात. बुध्द पौर्णिमेच्या लख्ख प्रकाशात संपुर्ण रात्र जंगलातील थरार अनुभवण्याची संधी यंदाही निसर्ग अनुभवाच्या माध्यमातून उपलब्ध होणार आहे. यावल वनविभागात वन्यप्राण्यांची प्रत्यक्ष आणि अप्रत्यक्ष गणना केली जाते, ज्यामध्ये ट्रॅप कॅमेऱ्याव्दारे गणना केली जात असुन नवखे निसर्गप्रेमी, वन्यजीव अभ्यासक तसेच विदयार्थी यांना देखील संपूर्ण रात्र जंगलात थरारक अनुभव लुटता यावा तसेच मचानावरुन वन्यजीवांची गणना करता यावी म्हणुन यावल वनविभागाच्या वतीने निसर्ग अनुभवाचे आयोजन केले आहे.

बुध्द पौर्णिमेच्या दिवशी लख्ख प्रकाशात निसर्गानुभव घेत असतांना तसेच रात्रीच्या वेळी प्राणी प्रगणना करीत असतांना प्रामुख्याने बिबट, अस्वल, सांबर, तडस, कोल्हा, यांसह चितळ, भेकर, चौशिंगा, साळिंदर, नीलगाय, रानडुक्कर, मोर आदी वन्यजीवांचे दर्शन घडते. तसेच विविध प्रकारचे पक्षीही आढळतात, जंगल सफारीच्या दरम्यान वनक्षेत्रात उत्तम निसर्गानुभवही मिळतो.यावल वनविभागातील नैसर्गिक पाणवठ्यांची डागडुजी, त्यातील पाण्याची स्वच्छता, नव्याने शुध्द पाणी पुरवठा करणे, पाणवठया शेजारी बांधलेल्या मचाणांची दुरुस्ती तसेच नवीन मचाणाची उभारणी आदी कामे अंतिम टप्प्यात आहेत. बुध्द पौर्णिमेच्या दिवशी लख्ख प्रकाशात वन्यजीवांचा थरारक अनुभव घेण्यासाठी यावर्षी यावल वनविभागाने बुध्द पौर्णिमेचे अवचित्त साधुन प्राणीगणनेसाठी निसर्गप्रेमी व पर्यावरणप्रेमी यांना सुवर्ण संधी उपलब्ध करुन दिलेली आहे. प्राणीगणना १२ मे २०२५ मध्ये सहभागी होण्यासाठी खालील दिलेल्या QR Code मार्फत पर्यावरणप्रेमी यांनी रजिस्ट्रेशन करावयाचे आहे. प्रती व्यक्तीसाठी यावल वनविभागामार्फत ५००/- रुपये इतका शुल्क आकारण्यात येणार आहे. सदर शुल्कातून निसर्ग अनुभवणाऱ्या व्यक्तींसाठी भोजन व इतर व्यवस्था करण्यात येणार आहे. तरी निसर्गप्रेमींनी मोठ्या प्रमाणात प्रतिसाद दयावा.सदर कार्यक्रमाचे नियोजन म. वनसंरक्षक (प्रा.) धुळे वनवृत्त निनू सोमराज, म. उप वनसंरक्षक, यावल वनविभाग, जळगाव जमीर शेख, सहाय्यक वनसंरक्षक (वनीकरण व वन्यजीव), चोपडा प्रथमेश हाडपे व सहाय्यक वनसंरक्षक (प्रादेशिक व कॅम्पा), यावल समाधान पाटील यांच्या मार्गदर्शनाखाली यावल वनविभागातील सर्व वनपरिक्षेत्र अधिकारी, वनपाल, वनरक्षक व वनमजुर करीत आहेत.