महिनाभरातच मविआला दुसरा धक्का बसणार? म्हात्रे पिता पुत्र भाजपच्या वाटेवर, पनवेलमध्ये राजकीय समीकरणं बदलणार.

 शेकापमधील काही नेते भाजपमध्ये जाण्याची चर्चा अनेक दिवसांपासून सुरू आहे. असे असतानाच शेकापचे ज्येष्ठ नेते आणि पनवेलचे माजी नगराध्यक्ष जे. एम. म्हात्रे आणि प्रितम म्हात्रे यांनी मविआमधून बाहेर पडण्याचा निर्णय घेतल्याने पनवेल तालुक्यात खळबळ उडाली आहे.विधानसभा निवडणुकीत महाविकास आघाडीकडून अपेक्षित सहकार्य न मिळाल्यामुळे पनवेलमधील शेतकरी कामगार पक्षाचे ज्येष्ठ नेते जे. एम. म्हात्रे आणि त्यांचे पुत्र प्रितम म्हात्रे यांनी महाविकास आघाडीसहित शेकाप पक्षातून बाहेर पडण्याचा निर्णय घेतला आहे. या संदर्भात जे. एम. म्हात्रे यांनी शेकाप पदाधिकाऱ्यांची मंगळवारी (२९ एप्रिल) पनवेलमध्ये बैठक घेऊन हा निर्णय घेतला असल्याची माहिती सूत्राकडून प्राप्त झाली आहे.काही दिवसांपूर्वी शेकाप सरचिटणीस माजी आमदार जयंत पाटील यांचे बंधू व रायगड जिल्हा परिषदेचे माजी अध्यक्ष आस्वाद पाटील, माजी बांधकाम सभापती चित्रा पाटील यांच्या सहित असंख्य कार्यकर्ते यांनी शेकापला सोडचिठ्ठी देत भाजपचे महाराष्ट्र प्रदेश कार्याध्यक्ष रवींद्र चव्हाण, यांच्या उपस्थित मुंबई येथील प्रदेश कार्यालयात प्रवेश केला होता.त्या घटनेला महिना उलटत नाही तोच दुसरा धक्का पनवेल मधून देण्याची तयारी सुरू झाली आहे.

शेकापमधील काही नेते भाजपमध्ये जाण्याची चर्चा अनेक दिवसांपासून सुरू आहे. असे असतानाच शेकापचे ज्येष्ठ नेते आणि पनवेलचे माजी नगराध्यक्ष जे. एम. म्हात्रे आणि प्रितम म्हात्रे यांनी मविआमधून बाहेर पडण्याचा निर्णय घेतल्याने पनवेल तालुक्यात खळबळ उडाली आहे.प्रितम म्हात्रे यांनी उरणमधून विधानसभेची निवडणूक लढवली होती. त्यावेळी त्यांच्याविरोधात भाजपचे महेश बालदी आणि शिवसेना उद्धव बाळासाहेब ठाकरे गटाचे मनोहर भोईर रिंगणात होते. महाविकास आघाडीत असूनही मविआच्या दोन उमेदवारांनी उरणमधून निवडणूक लढवली होती. त्यामुळे शेकापमध्ये प्रचंड नाराजी होती. प्रितम म्हात्रे विजयासाठी थोड्या मतांनी पराभूत झाले होते. त्यामुळे हा पराभव त्यांच्या आणि शेकापच्याही जिव्हारी लागला होता.आता जे. एम. म्हात्रे आणि प्रितम म्हात्रे यांनी जरी महाविकास आघाडीतून बाहेर पडण्याचा निर्णय घेतला असला तरी शेकापचे सरचिटणीस जयंत पाटील यांनी अद्याप मविआमधून बाहेर पडण्याचा निर्णय घेतलेला नाही. त्यामुळे पडद्यामागे काही राजकीय घडामोडी सुरू आहेत का, याची चर्चा सुरू आहे. मात्र, प्रितम म्हात्रे यांनी इतर पक्षात जाण्याच्या चर्चा फेटाळल्या आहेत. जे. एम. म्हात्रे म्हणजे भाऊंनी याबाबत आपल्यासोबत याविषयी कधीही चर्चा केली नाही, असे त्यांनी माध्यमांना सांगितले.