नाशिकमध्ये ‘मुळशी पॅटर्न’, तडीपार गुंड भैय्या कांदळकरला संपवलं, १४ जण घरात घुसले अन्…

तडीपार सराईत गुंड भैय्या उर्फ प्रवीण गोरक्षनाथ कांदळकर (वय २७, रा. शहा ता. सिन्नर) याची गावातीलच १४ जणांच्या टोळक्याने घरात घुसून बेदम मारहाण करीत हत्या केली.लोखंडी रॉड, लाठ्या काठ्या, घन आणि इतर धारदार शस्त्राने वार करीत तडीपार सराईत गुंड भैय्या उर्फ प्रवीण गोरक्षनाथ कांदळकर (वय २७, रा. शहा ता. सिन्नर) याची गावातीलच १४ जणांच्या टोळक्याने घरात घुसून बेदम मारहाण करीत हत्या केली. या घटनेने तालुक्यात खळबळ उडाली आहे. शनिवारी (दि. २६) सकाळी ११ वाजेच्या सुमारास ही घटना घडली. याप्रकरणी १४ जणांवर खुनाचा गुन्हा दाखल करण्यात आला आहे. सायंकाळी उशिरापर्यंत वावी पोलिसांनी चार संशयितांना ताब्यात घेतले होते.दरम्यान, शवविच्छेदनासाठी कांदळकर याचा मृतदेह जिल्हा रुग्णालयात नेण्याची प्रक्रिया सुरू होती. भैय्या कांदळकर हा दोन वर्षांच्या तडीपारीची शिक्षा भोगून घरी आला होता. शहा गावातीलच गोराणे नामक कुटुंबीयांशी त्याचे भैरवनाथाच्या यात्रेत वाद झाले होते.

तेव्हापासून दोन्ही गटात एकमेंकावर कुरघोडी सुरू होती. शनिवारी सकाळी सौरभ गोराणे, दिनेश वाळीबा गोराणे, वाळीबा गोराणे, शरद दिंगबर गोराणे, विजय दिंगबर गोराणे, सचिन गोरख बागल, राहुल गोरख बागल, अतुल अशोक गोराणे, आबा गोटीराम गोराणे, रवींद्र गोटीराम गोराणे, वैभव विलास गोराणे, दगू साप्ते (पाहुणा अस्तगावकर), गणेश सोनवणे, सर्जेराव रघुनाथ गोराणे (सर्वजण रा. शहा ता. सिन्नर जि. नाशिक) हे हातात कोयता, कुऱ्हाडी, लोखंडी रॉड, लाकडी दांडे घेवून त्याच्या घरात शिरले. सर्वांनी एकत्रित भैया कांदळकरला जबर मारहाण केली. त्यानंतर त्याला बाहेर ओढून अंगणात टाकून देत पळ काढला.दरम्यान, जखमी अवस्थेत भैया कांदळकरला त्याचे वडील आणि चुलत भावाने तातडीने प्रारंभी वावी प्राथमिक आरोग्य केंद्रात आणि त्यानंतर सिन्नर ग्रामीण रुग्णालयात दाखल केले. मात्र, रस्त्यातच त्याची प्राणज्योत मालवली होती.

डॉक्टरांनी तपासून त्यास मृत घोषित केले. याप्रकरणी त्याची आई विजया कांदळकर यांनी दिलेल्या फिर्यादीवरून १४ जणांवर खूनाचा गुन्हा दाखल करण्यात आला. शहा गावात तणावाचे वातावरण निर्माण झाल्याने सिन्नर, एमआयडीसी व वावी पोलिसांनी मोठा बंदोबस्त ठेवला आहे. सहाय्यक निरीक्षक गणेश शिंदे, हेड कॉन्स्टेबल शहाजी शिंदे अधिक तपास करीत आहेत.वावी, मुळगाव पोलिसांत १६ पेक्षा अधिक गुन्हे तडीपार असतानाही भैय्या कांदळकर गावात येऊन सर्रास गुन्हे करीत असे. दोन वर्षांपूर्वी तडीपार असताना तो गावात आला होता. वावी, मुसळगाव आणि सिन्नर पोलिसांनी त्याला पकडण्यासाठी त्याच्या घराभोवती सापळा रचला होता. यावेळी त्याने पोलिसांवर बंदूक रोखली होती. वावी पोलिसांत त्याच्यावर १६ पेक्षा अधिक गुन्हे दाखल आहेत. मुसळगाव पोलिसांतही एटीएम लुटीचा प्रयत्न केल्याप्रकरणी त्याच्यावर गुन्हा दाखल आहे.