रोहिणी पवारांनी इतिहास रचला, आळंदी देवस्थानच्या पहिल्या महिला विश्वस्त होण्याचा मान.

देवस्थान कमिटीच्या एकूण सहा विश्वस्तांपैकी तीन जागा रिक्त होत्या. या जागांवर ॲड. पवार, पाटील आणि लोंढे यांची निवड झाली संत ज्ञानेश्वर महाराज संस्थान कमिटी, आळंदी देवस्थानच्या विश्वस्तपदी प्रथमच एका महिलेची निवड करण्यात आली आहे. ॲड. रोहिणी पवार यांनी पहिल्या महिला विश्वस्त होण्याचा मान मिळवत इतिहास रचला आहे.झी टॉकीजच्या ‘गजर कीर्तन’ आणि बिग बॉस फेम ह. भ. प. पुरुषोत्तम महाराज पाटील तसेच ह. भ. प. चैतन्य महाराज कबीर लोंढे यांचीही विश्वस्तपदी निवड झाली आहे. प्रमुख जिल्हा व सत्र न्यायाधीश महेंद्र महाजन यांनी गुरुवारी ही नियुक्ती जाहीर केली.

देवस्थान कमिटीच्या एकूण सहा विश्वस्तांपैकी तीन जागा रिक्त होत्या. या जागांवर ॲड. पवार, पाटील आणि लोंढे यांची निवड झाली. यापूर्वी ॲड. राजेंद्र उमाप, डॉ. भावार्थ देखणे आणि योगी निरंजनाथ हे विश्वस्त म्हणून कार्यरत होते.विशेष म्हणजे, दोन दिवसांपूर्वीच उच्च न्यायालयाने देवस्थान कमिटीमध्ये महिला विश्वस्त निवडीसंदर्भातील रिट याचिका फेटाळली होती. त्यामुळे महिला विश्वस्त निवडीची शक्यता धूसर झाली होती. मात्र, जिल्हा न्यायाधीशांच्या निर्णयाने अनेक वर्षांची मागणी पूर्ण झाली.ॲड. रोहिणी पवार या कायदेतज्ज्ञ असून, सामाजिक आणि धार्मिक क्षेत्रातील त्यांचे योगदान उल्लेखनीय आहे. त्यांच्या नियुक्तीमुळे मंदिर व्यवस्थापनात कायदेशीर दृष्टिकोन आणि महिलांचा सहभाग वाढण्याची अपेक्षा आहे. आळंदीतील नागरिकांचा विश्वस्त कमिटीमध्ये सहभाग व्हावा, यासाठी वर्षभरापूर्वी स्थानिकांनी रस्त्यावर उतरून आंदोलन केले होते. या आंदोलनाला यश आले असून, ह. भ. प. चैतन्य महाराज आणि ह. भ .प. पुरुषोत्तम महाराज पाटील या आळंदीतील नागरिकांची निवड झाली आहे.दुसरीकडे, श्री संत निवृत्तिनाथ महाराज संजीवन समाधीला गुरुवारी (दि. २४) दुपारी दोन वाजेच्या सुमारास चंदनाचा लेप म्हणजेच उटी लावण्यात आली. पहाटेपासून रात्री ११ वाजेपर्यंत संत निवृत्तिनाथ महाराज मंदिर परिसर वारकऱ्यांसह भाविकांच्या गर्दीने फुलून गेला होता. तीर्थराज कुशावर्तावर पहाटेपासूनच स्नानासाठी गर्दी उसळली होती.