पत्नीसोबतची सहल ठरली शेवटची, पनवेलच्या दिलीप देसलेंना अखेरचा निरोप, कुटुंबाचा हृदय हेलावणारा आक्रोश.

दिलीप देसले आणि त्यांच्या पत्नी उषा देसले हे दोघे सहलीसाठी सोमवारी काश्मीरला गेले होते. या सहलीच्या पहिल्याच दिवशी पहलगाम येथील बैसरनमध्ये मंगळवारी दुपारी 2 वाजता झालेल्या भ्याड दहशतवादी हल्ल्यात देसले यांना प्राण गमवावे लागले.जम्मू आणि काश्मीरमधील पहलगाम येथे दहशतवाद्यांनी केलेल्या भ्याड हल्ल्यात मृत्युमुखी पडलेले दिलीप देसले (62) यांच्या पार्थिवावर पनवेलमध्ये बुधवारी संध्याकाळी शोकाकुल वातावरणात अंत्यसंस्कार करण्यात आले. नाशिक जिल्ह्यातील मालेगाव तालुक्यात मूळ गाव असलेले देसले कुटुंब 30 वर्षांपासून नवीन पनवेलमध्ये वास्तव्यास आहे. नवीन पनवेल येथील पोदी स्मशानभूमीत त्यांच्या पार्थिवावर अंत्यसंस्कार करण्यात आले. यावेळी राज्याचे मंत्री दादा भुसे यांच्यासह लोकप्रतिनिधी, उच्चपदस्थ अधिकारी उपस्थित होते.

नवीन पनवेल सेक्टर 12 येथे देसले कुटुंब वास्तव्यास आहे. पत्नी, दोन मुली, एक मुलगा, सून, जावई आणि नातवंडे असा त्यांचा परिवार आहे. अत्यंत शांत स्वभावाचे म्हणून ते परिचित होते. काही वर्षांपूर्वी एका खासगी कंपनीतून ते सेवानिवृत्त झाले होते. त्यांच्या मृत्यूची बातमी समजल्यानंतर सर्वांना धक्का बसला.दिलीप देसले आणि त्यांच्या पत्नी उषा देसले हे दोघे सहलीसाठी सोमवारी काश्मीरला गेले होते. या सहलीच्या पहिल्याच दिवशी पहलगाम येथील बैसरनमध्ये मंगळवारी दुपारी 2 वाजता झालेल्या भ्याड दहशतवादी हल्ल्यात देसले यांना प्राण गमवावे लागले. त्यांच्या पत्नी उषा देसले यांना या हल्ल्यात दुखापत झाली नाही.श्रीनगरहून सायंकाळी सहा वाजता देसले यांचा मृतदेह राहत्या घरी आणण्यात आला. पनवेल महापालिकेच्या शववाहिनीतून त्यांचा मृतदेह मुंबई विमानतळावरून नवीन पनवेल येथे आणला गेला. पनवेलचे आमदार प्रशांत ठाकूर यावेळी विमातळावर उपस्थित होते.भाजपचे प्रदेश कार्यकारी अध्यक्ष रवींद्र चव्हाण, राज्याचे मंत्री आशीष शेलार, मंगलप्रभात लोढा, गुलाबराव पाटील, दादा भुसे, योगेश कदम आदी नेत्यांनी देसले यांच्या पार्थिवाचे अंत्यदर्शन घेतले. संध्याकाळी सहा वाजता देसले यांचे पार्थिव राहत्या घरी आणण्यात आले आणि 7 वाजता देसले यांच्यावर अंत्यसंस्कार करण्यात आले.दरम्यान, दहशतवादी हल्ल्यात जखमी झालेले पनवेलचे रहिवासी सुबोध पाटील हे कामोठ्यात सेक्टर 21 येथील रॉयल हाइट्स सोसायटीत वास्तव्यास आहेत. याबाबत माहिती मिळताच पाटील कुटुंबीयांच्या घरी जाऊन नातेवाइक, मित्रांनी विचारपूस केली. जखमी सुबोध पाटील यांच्या खांद्याला गोळी घासून गेली, असे सांगण्यात आले.