डिनरला माशांवर ताव, तितक्यात बायकोचा हल्ला अन् काही मिनिटांत..; माजी डीजीपींसोबत काय घडलं?

कर्नाटकचे माजी पोलीस महासंचालक ओम प्रकाश यांची त्यांच्याच पत्नीने हत्या केल्याचा आरोप आहे. सूत्रांनी दिलेल्या माहितीनुसार, पत्नी पल्लवी यांनी आपल्या गुन्ह्याची कबुलीही दिली आहे.कर्नाटकचे माजी पोलीस महासंचालक (डीजीपी) ओम प्रकाश यांच्या हत्येप्रकरणी अनेक खळबळजनक गोष्टींचा उलगडा होत आहे. या हत्येत त्यांची पत्नी पल्लवीच नाही तर मुलीचाही सहभाग असल्याचा आरोप करण्यात आला आहे. माजी डीजीपींच्या मुलाने स्वतः वडिलांच्या हत्येचा आरोप करत आई आणि बहिणीविरोधात तक्रार दाखल केली आहे.ज्यावेळी ओम प्रकाश यांची हत्या करण्यात आली, त्यावेळी ते डिनर टेबलवर बसलेले होता. सूत्रांनी दिलेल्या माहितीनुसार, ओम प्रकाश हे मासे खात होते, ते आपल्या ताटातील दोन प्रकारच्या माशांचा आस्वाद घेत असतानाच त्यांची पत्नी पल्लवीने वाद घालण्यास सुरुवात केली आणि अचानक त्यांच्यावर चाकूने हल्ला केला. जेवणाचे ताट टेबलाजवळ पडलेले होते आणि ओम प्रकाश हे त्याच्या बाजुला रक्ताच्या थारोळ्यात पडलेले होते.

क्राईम सीनचे फोटो पाहता ओम प्रकाश यांनी जीव वाचवण्यासाठी संघर्ष केल्याचं दिसून येतं. मिळालेल्या माहितीनुसार, ओम प्रकाश यांची हत्या केल्यानंतर पत्नी आणि मुलीने स्वत:ला एका खोलीत कोंडून घेतले. त्यानंतर पत्नी पल्लवीने पोलिसांना फोन करून हत्येची कबुली दिली. पोलीस अधिकारी जेव्हा घरात पोहोचले तेव्हा ओम प्रकाश यांचा मृतदेह आढळून आला. त्यांची मुलगी क्रितीने स्वत:ला खोलीत कोंडून घेतलं आणि ती आरडाओरड करत होती. वारंवार विनंती करूनही या दोघींनी दार उघडण्यास नकार दिला, त्यानंतर पोलिसांनी दार तोडून त्यांना ताब्यात घेतलं. पल्लवीने आत्मसमर्पण केले आणि पोलिसांसमोर आपला गुन्हा कबुल केला. सध्या तिला ताब्यात घेण्यात आले असून तिची चौकशी सुरू आहे. तर, मुलगी क्रितीचीही चौकशी करण्यात येत आहे.ओम प्रकाश यांची हत्या का करण्यात याची याचा तपास सुरु आहे. त्यांच्यावर धारदार शस्त्राने हल्ला चढवण्यात आला होता. यात अतिरक्तस्त्राव झाल्याने त्यांचा मृत्यू झाल्याचं समोर आलं आहे.

ओम प्रकाश यांचा मुलगा कार्तिकेश याने पोलिसात दाखल केलेल्या तक्रारीत त्याने आई पल्लवी आणि बहीण क्रिती यांच्यावर वडिलांच्या हत्येचा आरोप केला आहे. मुलाने दाखल केलेल्या तक्रारीनुसार पल्लवी मानसिकदृष्ट्या अस्थिर असून गेल्या 12 वर्षांपासून ते स्किझोफ्रेनियाने त्रस्त असल्याचं सांगण्यात येत आहे. तिच्यावर उपचार सुरू आहेत.पोलिसांनी आरोपीविरुद्ध आयपीसी कलम १०३, १०३(१)(३)(५) अन्वये एफआयआर नोंदवला आहे. एफआयआरनुसार, पल्लवीला अनेकदा भीती वाटत होती की पती ओम प्रकाश हे तिला त्रास देऊ शकतो. दुसरीकडे, ओम प्रकाशला ओळखणाऱ्या लोकांनी सांगितले की, ते म्हणत असंत की कुटुंबाकडून त्यांना धोका आहे.हत्येमागील कारण शोधण्यासाठी सध्या पोलीस सर्व बाजूंनी तपास करत आहेत. या हत्येमागे मालमत्तेचा वादही कारणीभूत असण्याची शक्यता सूत्रांकडून व्यक्त होत आहे. कारण कर्नाटकातील दांडेली येथे जमिनीच्या तुकड्यावरून पती-पत्नीमध्ये काही वाद झाला होता. याप्रकरणी काही महिन्यांपूर्वी पल्लवीने एचएसआर लेआऊट पोलिस ठाण्यातही तक्रार नोंदवली होती. पोलीस ठाण्यात तक्रार नोंदवली जात नाही म्हणून तिने पोलिस ठाण्यासमोर ठिय्या आंदोलनही केल्याचे सूत्रांनी सांगितलं आहे. सध्या पोलीस आरोपीची कसून चौकशी करत आहेत.ओम प्रकाश यांनी पत्नीकडून होणारा छळ सहन होत नसल्याचे अनेकवेळा वरिष्ठ पोलिस अधिकाऱ्यांना सांगितल्याचे सूत्रांनी सांगितले आहे. प्राथमिक तपासात ओम प्रकाश यांच्या छातीवर, पोटावर आणि हातावर वार करण्यात आले असून त्यांच्या शरीरावर 8-10 जखमा असल्याचे समोर आले आहे. ओटीपोटात 4-5 जखमा होत्या, ज्यामुळे जास्त रक्तस्त्राव झाला आणि त्यामुळे त्यांचा मृत्यू झाला.