संशयाने संसाराची राखरांगोळी! आधी पत्नीला संपवलं, चौकशीसाठी बोलविलेल्या पतीने पोलिस ठाण्यातच… पुणे हादरलं.

शरद चितळे ‘एमआयडीसी’तील एका खासगी कंपनीत कामाला होता. त्याची पत्नी कांचन आशा वर्कर होत्या. त्यांचे विवाहबाह्य संबंध असल्याचा शरदला संशय होता.आशा वर्कर असलेल्या पत्नीचे विवाहबाह्य संबंध असल्याच्या संशयातून पतीने गळा दाबून तिचा खून केला; तसेच स्वत:देखील गळफास घेऊन आत्महत्येचा प्रयत्न केला. मात्र, तो वाचला. यानंतर या प्रकरणी चिखली पोलिसांनी पतीला शुक्रवारी चौकशीसाठी बोलावले असता त्याने पोलिस ठाण्यात फरशी पुसण्याचे द्रव प्यायले. उपचारादरम्यान शनिवारी पहाटे पावणेतीनच्या सुमारास त्याचा मृत्यू झाला.
पोलिस उपायुक्त डॉ. शिवाजी पवार यांनी दिलेल्या माहितीनुसार, शरद रूपचंद चितळे (३३, रा. रुपीनगर, तळवडे) असे विष पिऊन आत्महत्या केलेल्याचे नाव आहे. कांचन शरद चितळे (वय २६) असे खून झालेल्या महिलेचे नाव आहे.शरद चितळे ‘एमआयडीसी’तील एका खासगी कंपनीत कामाला होता. त्याची पत्नी कांचन आशा वर्कर होत्या. त्यांचे विवाहबाह्य संबंध असल्याचा शरदला संशय होता. त्यातून त्याने १३ एप्रिल रोजी राहत्या घरात कांचन झोपेत असताना त्यांचा गळा आवळला.

यात त्या बेशुद्ध झाल्या. यानंतर त्याने स्वत:देखील दोरीने पंख्याला गळफास घेतला. याबाबत माहिती मिळताच चिखली पोलिसांनी घटनास्थळी धाव घेतली. शरद हा पंख्याला लटकलेल्या अवस्थेत होता. त्याला खाली उतरवून रुग्णालयात दाखल केले; तसेच कांचन यांना महापालिकेच्या यशवंतराव चव्हाण स्मृती (वायसीएम) रुग्णालयात दाखल केले. उपचारापूर्वीच त्यांचा मृत्यू झाल्याचे डॉक्टरांनी सांगितले. दरम्यान, शरद याच्यावर उपचार सुरू होते. त्याला शुक्रवारी रुग्णालयातून सोडण्यात आले. कांचन यांचा शवविच्छेदन अहवाल प्राप्त झाला. यामध्ये गळा दाबल्याने त्यांचा मृत्यू झाल्याचे नमूद होते. त्यानुसार पोलिसांनी शरद याला नातेवाइकांसह चिखली पोलिस ठाण्यात बोलावले होते.या वेळी लघुशंकेचा बहाणा करून तो पोलिस ठाण्यातील स्वच्छतागृहात गेला आणि दरवाजा आतून बंद केला. त्यामुळे पोलिसांनी दरवाजा तोडला. त्या वेळी शरद याने फरशी पुसण्याचे द्रव पिल्याचे निदर्शनास आले. त्याला नातेवाइकांच्या मदतीने पोलिसांनी ‘वायसीएम’ रुग्णालयात दाखल केले. उपचारादरम्यान शनिवारी पहाटे पावणेतीनच्या सुमारास त्याचा मृत्यू झाला. पोलिस ठाण्यात किंवा आवारात मृत्यू झाल्यास संबंधिताचे शवविच्छेदन तज्ज्ञ डॉक्टरांच्या पॅनेलकडून केले जाते. पुण्यातील ससून रुग्णालयात डॉक्टरांचे पॅनेल असल्याने शरद चितळे याचा मृतदेह ससून रुग्णालयात हलविण्यात आला. तेथे शवविच्छेदन करून अहवाल प्राप्त होणार आहे.पोलिस ठाण्यात किंवा पोलिस ठाण्याच्या आवारात मृत्यू झाल्याच्या प्रकरणात गुन्हे अन्वेषण विभागाकडून (सीआयडी) या प्रकरणाचा तपास केला जातो. शरद चितळे आत्महत्या प्रकरणातदेखील ‘सीआयडी’कडून तपास करण्यात येत आहे.