निवडणुकीत एकट्या कासलेला 10 लाख दिले, मग…; धनंजय मुंडेंच्या आमदारकीविरुद्ध न्यायालयात धाव.

रणजीत कासले यांना धनंजय मुंडे यांनी ईव्हीएमपासून दूर जाण्यासाठी दहा लाख रुपये दिल्याच कासले यांनी म्हटले होतेराज्याच्या राजकारणात गेल्या 4 महिन्यांपासून बीड (Beed) जिल्हा केंद्रस्थानी आहे. अगोदर विधानसभा निवडणुकांमध्ये आमदार धनजंय मुडेंच्या निकटवर्तीयांकडून झालेल्या गुंडगिरीमुळे शरद पवारांच्या राष्ट्रवादीने गंभीर आरोप केले होते. त्यानंतर, सरपंच संतोष देशमुख हत्याप्रकरणावरुन राज्यात तीव्र संतापाची लाट उसळल्यानंतर धनजंय मुडेंना मंत्रीपदाचा राजीनामा देणे भाग पडले. आता, बीडमधील निलंबित पोलीस निरीक्षक रणजीत कासले यांनी धनंजय मुडेंवर (Dhananjay munde) गंभीर आरोप केले आहेत. तसेच, त्यांच्या माणसांकडून माझ्या बँक अकाऊंटवर 10 लाख रुपये टाकण्यात आल्याचेही त्यांनी सांगितले. त्यावरुन, आता परळी मतदारसंघातील शरद पवारांच्या राष्ट्रवादीचे उमेदवार विधानसभा उमेदवार राजेसाहेब देशमुख यांनी न्यायालयात दाद मागणार असल्याचे म्हटले.

तसेच, एकट्या रणजीत कासलेला 10 लाख दिले असतील तर बाकीच्यांना किती दिले, असा सवालही देशमुख यांनी विचारला आहे. रणजीत कासले यांना धनंजय मुंडे यांनी ईव्हीएमपासून दूर जाण्यासाठी दहा लाख रुपये दिल्याच कासले यांनी म्हटले होते. त्यावर परळी विधानसभेचे राष्ट्रवादी काँग्रेस शरद पवार गटाचे उमेदवार राजेसाहेब देशमुख यांनी परळी मतदारसंघात कशा पद्धतीने प्रशासनाचा गैरवापर झाला, याची स्पष्टता दिली आहे. एकट्या कासलेला दहा लाख रुपये दिले तर इतरांना किती रुपये वाटले? असतील असा सवाल करत परळी विधानसभा मतदारसंघात प्रशासनाचा कशा रितीने गैरवापर झाला हे समोर येत अल्याचे राजेसाहेब देशमुख यांनी म्हटले. आता या सर्व प्रकरणाच्या चौकशीसाठी न्यायालयात जाणार असल्याचे देखील देशमुख यांनी सांगितले.

परळी मतदारसंघात विधानसभा निवडणुकीनिमित्त धनंजय मुंडे आणि राजेसाहेब देशमुख एकमेकांविरोधात उभे ठाकले होते. मात्र, या निवडणुकीत शरद पवार गटाचे उमेदवार राजेसाहेब देशमुख यांचा मोठ्या फरकाने पराभव झाला. आता, कासले यांच्या आरोपानंतर देशमुख पुढे आले असून या प्रकरणाच्या चौकशीसाठी ते न्यायालयात धाव घेणार आहेत. तर, यापूर्वीच सामाजिक कार्यकर्त्या अंजली दमानिया यांनी धनंजय मुंडेंच्या निवडीविरुद्ध न्यायालयात दाद मागितली आहे. विधानसभा निवडणुकांवेळी परळी मतदारसंघात ईव्हीएमसोबत छेडछाड करण्यात आली, त्यासाठीच मला बाजूला करण्यात आलं आणि नंतर अकाऊंटवर 10 लाख रुपये देण्यात आल्याचं निलंबित पोलिस उपनिरीक्षक रणजीत कासले यांनी म्हटलं. तसेच, वाल्मिक कराडचा एन्काऊंटर करण्यासाठी धनंजय मुंडे यांची ऑफर होती असा दावाही त्यांनी पुन्हा एकदा केला. रणजीत कासले हे पुणे विमानतळावर आल्यानंतर त्यांना बीडच्या पोलिसांनी अटक केली आहे. त्यापूर्वी त्यांनी माध्यमांशी संवाद साधला. त्यामध्ये धनंजय मुंडेपासून ते मुख्यमंत्री फडणवीसांपर्यंत आणि बीड पोलिसांपासून ते आयएएस-आयपीएस अधिकाऱ्यांपर्यंत सगळ्यांवर रणजीत कासले यांनी गंभीर आरोप केले आहेत.