महिलेने हटकताच शिवीगाळ-मारहाण; पालघरच्या विवाहितेचं धाडस अफाट, चोराला मागून धरलं, सोन्याची बॅगही पकडली पण..

पालघरमध्ये चक्क एका विवाहितेने घरात घुसलेल्या चोरांशी दोन हात केले. विशेष म्हणजे त्यापैकी एकाला मोठ्या धाडसाने पकडून ठेवत पोलिसांच्या ताब्यात दिले.चित्रपटात नायक आणि चोरांमध्ये झटापट होते, हे आपण बऱ्याचदा पाहिले आहे. पण, पालघरमध्ये चक्क एका विवाहितेने घरात घुसलेल्या चोरांशी दोन हात केले. विशेष म्हणजे त्यापैकी एकाला मोठ्या धाडसाने पकडून ठेवत पोलिसांच्या ताब्यात दिले. या झटापटीत ही विवाहिता किरकोळ जखमी झाली असून, दुसरा चोर मात्र दागिने घेऊन पसार झाला आहे. मात्र, या विवाहितेच्या धाडसाचे जिल्हाभरात कौतुक होत आहे.काजल चौहान असे या विवाहितेचे नाव आहे. पालघर नगर परिषद क्षेत्रातील टेंभोडे गावच्या आदर्श नगर वसाहत येथील वसंत विला गृह संकुलात ती कुटुंबासोबत राहते. सोमवारी काजल पतीसह शिरगाव येथे फिरायला गेली होती. तिथून रात्री उशिरा आल्यानंतर काजलचे पती गाडी पार्क करत होते, तर काजल तोपर्यंत घरी आली. त्यावेळी एक व्यक्ती तिला त्यांच्या घरातून बाहेर पडताना दिसली.

दरम्यान, वॉशिंग मशिन बिघडली असल्याने सासूबाईंनी टेक्निशियन बोलावला होता. त्यामुळे तो टेक्निशियन असावा, असे काजलला प्रथम वाटले. मात्र, त्याच्याकडे विचारपूस केली असता, या पहिल्या चोराने तिला शिवीगाळ करायला सुरुवात केली. तिला हाताने आणि लोखंडाच्या दांडक्याने मारले. मात्र, तिने त्याच्याकडून स्वतःचा बचाव केला.तेवढ्यात त्याने दुसऱ्या चोराला पळण्यास सांगितलं, त्यामुळे त्याने तिथून पोबारा केला. परंतु, काजलने दुसऱ्या चोराला मागून पकडले आणि त्याच्याकडील दागिन्यांची बॅगही पकडली. या अचानक झालेल्या प्रकारामुळे चोर बावरला आणि त्याने बॅग तिथेच टाकून तो पळण्याचा प्रयत्न करू लागला. मात्र, काजलने चोराला सोडले नाही. तेवढ्यात दुसरा चोर नेमका पुन्हा माघारी आला आणि दागिन्यांची बॅग घेऊन पळून गेला.काजलचे पती घरी आले. त्यावेळी त्यांनी या चोराला पकडले. या दरम्यान आजूबाजूचे लोक गोळा झाले. त्यांनी या घटनेची माहिती पोलिसांना दिली. त्यानंतर पालघर पोलिस घटनास्थळी दाखल होत, त्यांनी चोराला ताब्यात घेतले. या प्रकरणी पालघर पोलिसांनी घरफोडीचा गुन्हा दाखल केला असून, पुढील तपास सुरू आहे. पकडलेल्या चोराला न्यायालयात हजर केले असता, त्याला पोलिस कोठडी देण्यात आली आहे.