एसटी जाहिरात कंत्राट रद्द होणार; परिवहनमंत्री प्रताप सरनाईक यांची महामंडळाला सूचना.

 त्यांच्याकडून अपेक्षित उत्पन्न मिळत नसल्याने त्यांचे करार रद्द करावेत, अशा स्पष्ट सूचना परिवहनमंत्री प्रताप सरनाईक यांनी एसटी महामंडळाला दिल्या आहेत. राज्य परिवहन (एसटी) महामंडळाने जाहिरातीसाठी विविध संस्था, कंत्राटदारांना काम दिले आहे. मात्र, त्यांच्याकडून अपेक्षित उत्पन्न मिळत नसल्याने त्यांचे करार रद्द करावेत, अशा स्पष्ट सूचना परिवहनमंत्री प्रताप सरनाईक यांनी एसटी महामंडळाला दिल्या आहेत. कंत्राटदारांच्या मनमानी कारभारामुळे एसटी महामंडळाला आर्थिक नुकसानही सहन करावे लागत होते. ‘जाहिरात घोटाळ्यामुळे एसटीचे नुकसान’, या मथळ्याखाली सर्वप्रथम ‘महाराष्ट्र टाइम्स’ने एसटी महामंडळाच्या जाहिरात कंत्राटदारांची मनमानी मांडली होती.एसटी महामंडळाला कंत्राटदारांच्या मनमानी कारभारामुळे एसटी महामंडळाला आर्थिक नुकसानही सहन करावे लागत होते. या वृत्ताची दखल घेत मंत्री प्रताप सरनाईक यांनी एसटी महामंडळातील वरिष्ठ अधिकाऱ्यांची बैठक बोलावली. महामंडळाचे व्यवस्थापकीय संचालक डॉ. माधव कुसेकर यांच्यासह उपस्थितांना त्यांनी सूचना केल्या. एसटी महामंडळाच्या बसगाड्या आणि स्थानक, आगारांवर करण्यात येणाऱ्या जाहिरातींसाठी सर्वंकष नवीन धोरण तयार करून त्या माध्यमातून मिळणारे उत्पन्न १०० कोटी रुपयांपर्यंत वाढवावे, अशा सूचनाही त्यांनी यावेळी दिल्या.

जाहिरातीच्या कंत्राटदारांकडून एसटी महामंडळाला सध्या २२-२४ कोटी रुपयांचे उत्पन्न मिळते. एसटी स्थानके, आगार अशा जाहिरातीसाठी योग्य जागा राज्यातील मध्यवर्ती ठिकाणी आहेत. यामुळे १०० कोटी उत्पन्न अपेक्षित असताना प्रत्यक्षात नाममात्र उत्पन्न महामंडळाला प्राप्त होत आहे. यामुळे सध्याच्या जाहिरात संस्थांसोबतचे करार रद्द करावे. चांगले उत्पन्न देणाऱ्या संस्थांची निवड करावी. अधिकाधिक उत्पन्न मिळवण्याच्या दृष्टीने प्रामाणिक प्रयत्न करावेत, असेही मंत्री प्रताप सरनाईक यांनी सांगितले.एसटी ताफ्यात नव्या बस दाखल होत आहेत. नव्या बसमध्ये प्रवासी व बस सुरक्षा लक्षात घेऊन जाहिरातीसाठी उपयुक्त पॅनेल बसवण्याची व्यवस्था करावी. तशा सूचना संबंधितांना द्याव्यात. जुन्या बसगाड्यांमध्ये असे पॅनेल बसवण्याबाबत चाचपणी करून शक्य असल्यास त्याची व्यवस्था करावी.

बसस्थानके सुधारण्यासाठी नियोजन करावे, अशा सूचनाही बैठकीत देण्यात आल्या.एसटी महामंडळ मोठ्या प्रमाणात डिझेल खरेदी करते. यामुळे खरेदीच्या निविदा काढाताना त्यात ‘सामाजिक दायित्व निधी (सीएसआर फंड) एसटी प्रवाशांसाठी वापरावा’, अशी अट ठेवावी. डिझेल पुरवठा करण्याऱ्या संस्थांच्या सीएसआर फंडातून राज्यातील महत्त्वाच्या बसस्थानकात महिला स्वच्छतागृह आणि हिरकणी कक्षाची उभारणी करून त्यांची देखभाल करणारी व्यवस्था निर्माण करावी, अशा सूचना सरनाईक यांनी बैठकीत दिल्या.एसटी ताफ्यात २,६४० तयार बसगाड्या दाखल होत आहेत. यापैकी मार्चअखेर ८०० बस आल्या असून, १०० आगारांमध्ये त्या सेवेत आहेत. नव्या बसबाबत प्रवाशांमध्ये चांगली प्रतिक्रिया आहे. येत्या दोन महिन्यात राज्यातील २५१ आगारांना नव्या बस मिळतील, असे नियोजन करून बसगाड्यांची वाटणी करावी. उन्हाळी हंगामातील गर्दीसाठी ही अशाच चांगल्या बसगाड्या प्रवाशांना उपलब्ध करून द्याव्यात, अशी सूचना परिवहनमंत्री सरनाईक यांनी दिली