मिनी बसला भीषण आग : चार कामगारांचा होरपळून मृत्यू तर दोन गंभीर !

राज्यात मार्च महिन्यात उन्हाचा तडाखा सुरु झाला आहे गेल्या काही दिवसापासून अनेक ठिकाणी आगीच्या घटना घडल्या असून आता पुणे शहरातील हिंजवडी परिसरात एका मिनी बसला आग लागल्याची भयंकर घटना घडली आहे. या घटनेत 4 कामगारांचा होरपळून मृत्यू झाला असून, दोघे जण गंभीर भाजलेत. हिंजवडी पोलिस स्टेशन, पिंपरी चिंचवड येथील वरिष्ठ पोलिस निरीक्षक कन्हैया थोरात यांनी या भीषण अपघाताची माहिती दिली.

मिळालेल्या माहितीनुसार कंपनीच्या कामगारांना घेऊन चाललेल्या टेम्पो ट्रॅव्हलरला ही आग लागली. यात चार जणांचा होरपळून मृत्यू झाला तर दोन जण जखमी आहेत. जखमींपैकी चालकाची प्रकृती गंभीर आहे. या बसमध्ये एकूण 12 कामगार होते. मात्र, मागचा दरवाजा न उघडल्याने ही चौघांचा होरपळून मृत्यू झाला आहे. पुण्यातील हिंजवडी परिसरामध्ये टेम्पोला भीषण आग लागल्याची ही घटना घडली. यामध्ये गाडीचा दरवाजा वेळेत न उघडल्याने चार कर्मचाऱ्यांचा जागीच होरपळून मृत्यू झाल्याची तर दोनजण जखमी झाल्याची घटना समोर आली आहे. या घटनेत टेम्पो जळून खाक झाला आहे, तर टेम्पोमध्ये चौघांचा होरपळून मृत्यू झाला आहे.