कृष्णा आंधळेच्या शोधात रात्रभर सर्च ऑपरेशन, पण.. नाशकात दुचाकीवर दिसल्याचा दावा फसवाच.

संतोष देशमुख हत्येप्रकरणातील व्हायरल फोटोंने खळबळ माजवली. एक आरोपी कृष्णा आंधळे अद्याप फरार असून, पोलीस त्याचा शोध घेत आहेत. नाशिकमध्ये आंधळे दिसल्याचा दावा स्थानिकांनी केला. यानंतर पोलिसांनी थेट सर्च ऑपरेशन सुरू केले.संतोष देशमुख यांच्या हत्येनंतर मोठे खुलासे होताना दिसले. देशमुखांची हत्या किती जास्त क्रूरपणाने केली, हे व्हायरल होणाऱ्या फोटोतून पुढे आले. संतोश देशमुख हत्या प्रकरणातील एक आरोपी अजूनही फरार आहे. इतर कोठडीत आहेत. एसआयटी आणि सीआयडीकडून याप्रकरणातील तपास सुरू आहे. संतोष देशमुख यांच्या हत्येदरम्यानचे फोटो व्हायरल झाल्यानंतर मोठी खळबळ निर्माण झाली. देशमुखांच्या हत्येनंतर धनंजय मुंडे यांच्यावर राजीनाम्यासाठी दबाव होता. शेवटी मुंडेंनी आपल्या मंत्रिपदाचा राजीनामा मुख्यमंत्री देवेंद्र फडणवीस यांच्याकडे दिला.

फरार आरोपी कृष्णा आंधळे याच्या शोधात पोलिस तीन महिन्यांपेक्षाही अधिक काळापासून आहेत. मात्र, अजूनही कृष्णा आंधळेला अटक करण्यात पोलिसांना यश मिळाले नाही. अनेकांनी तर कृष्णा आंधळे जिवंतच नसल्याचा थेट दावाही केला. नाशिकमध्ये कृष्णा आंधळे दिसल्याचा फोन पोलिसांना आला. त्यानंतर पोलिसांनी सर्च ऑपरेशन संपूर्ण शहरात केले. स्थानिकांनी दावा केला की, कृष्णा आंधळे गाडीवरून जात होता.कृष्णा आंधळे ज्या गाडीवरून जात असल्याचा दावा करण्यात आला. त्याचे सीसीटीव्ही फुटेजही पुढे आले. मात्र. यामध्ये गाडीवरून जाणाऱ्याचा चेहरा आणि गाडीचा नंबर दोन्ही व्यवस्थित दिसत नव्हते.

नाशिक पोलिसांनी रात्रभर सर्च ऑपरेशन सुरू ठेवले. मात्र, अजूनही कृष्णा आंधळेबद्दल काहीच माहिती पुढे आली नाही. आठ दिवसांपूर्वी देखील नाशिकमध्ये कृष्णा आंधळे दिसल्याची चर्चा जोरदार रंगताना दिसली.पोलिस अलर्ट मोडवर आहेत आणि त्याचा शोध घेत आहेत. कालपासून सर्च ऑपरेशन करूनही पोलिसांच्या हाती काहीच लागले नाहीये. यामुळे कृष्णा आंधळे दिसल्याची फक्त आणि फक्त अफवाच असल्याचे आता सांगितले जात आहे. संतोष देशमुख हत्या प्रकरणातील सर्व आरोपी पोलिसांच्या हाती लागली आहेत. मात्र, कृष्णा आंधळे हाच एकटा फरार आहे. संतोष देशमुख यांच्या हत्येचे व्हायरल झालेल्या फोटोमध्ये कृष्णा आंधळे दिसत होता.