भयाण काळरात्र, माकडांचा हैदोस, अशातच मुंबईचे ट्रेकर्स संकटात, मग सुचली एक युक्ती, अन्…

“महाराष्ट्र माउंटेनियर रेस्क्यू कॉर्डिनेशन सेंटर” यांच्या मार्फत, रक्षा सामाजिक विकास मंडळ, कर्जत येथील रेस्क्यू टीमच्या अमित गुरव यांना सायंकाळी ७ च्या सुमारास कॉल आल्यावर ते तातडीने पथकासहीत रवाना झाले. कर्जत तालुक्यातील प्रसिद्ध ढाक भैरी कड्यावर ट्रेकसाठी गेलेल्या आणि अडचणीत सापडलेल्या मुंबईतील तीन तरुणांची, रात्रभर सुरू असलेल्या शोधमोहीमेनंतर सुखरूप सुटका करण्यात आली. हेमंत कंक (२४, पवई), रोहित शेवाळे (२५, कोपरखैरणे), आणि गीतेश (२४, ठाणे) हे तिघे युवक शनिवारी, २६ एप्रिल रोजी सकाळी आठ वाजता कर्जत तालुक्यातील सांडशी ढाक भैरी ट्रेकसाठी रवाना झाले. प्रारंभिक मार्ग शोधताना बराच वेळ गेला आणि जवळ असलेले पाणीही संपले. यामुळे त्यांची स्थिती आणखी बिकट झाली. काही वेळाने ते भैरी गुहेजवळ पोहोचले, परंतु तिथेही रस्ता चुकल्याने ते अडकल्याचे समजले.

तंग परिस्थितीत त्यांनी यूट्यूबवरून शोध घेत  टीमशी संपर्क साधण्याचा प्रयत्न केला. या दरम्यान, गीतेशच्या गुडघ्याला दुखापत झाली आणि उर्वरित दोघांचे शूज फाटल्याने त्यांचा प्रवास अत्यंत कष्टप्रद ठरला. भूकेलेल्या माकडांच्या त्रासामुळेही त्यांची हालअपेष्टा वाढली. “महाराष्ट्र माउंटेनियर रेस्क्यू कॉर्डिनेशन सेंटर”यांच्या मार्फत, रक्षा सामाजिक विकास मंडळ, कर्जत येथील रेस्क्यू टीमच्या अमित गुरव यांना सायंकाळी ७ च्या सुमारास कॉल आल्यावर ते तातडीने पथकासहीत रवाना झाले. आवश्यक पाणी, अन्नसामग्री आणि बचाव साहित्य घेऊन सांडशी गावात पोहोचल्यावर स्थानिक तरुणांच्या मदतीने शोधकार्य सुरू झाले.

या मोहिमेत सोमनाथ तुंगे (डिकसळ), सुमित हरि गुरव (कर्जत) तसेच स्थानिक तरुण ऋषी कदम व संकेत कदम (सांडशी) यांनी अत्यंत धाडसाने आणि चिकाटीने कामगिरी बजावली. अमावस्येच्या अंधाऱ्या रात्री, कठीण मार्गावर, रात्री १०:३० च्या सुमारास अडकलेल्या तरुणांचा शोध लागला. त्यानंतर सावधगिरीने रात्री १ वाजता सर्वजण सांडशी गावात परतले. स्थानिक तरुणांनी या तिघांची जेवणाची व विश्रांतीची उत्तम व्यवस्था केली आणि रविवार सकाळी त्यांना सुरक्षितरित्या त्यांच्या मुंबईतील घरी पाठवण्यात आले. बचाव कार्याची ही संपूर्ण घटना स्थानीय तरुणांतील सामाजिक जबाबदारी आणि रेस्क्यू टीमच्या धाडसी प्रयत्नांचे जिवंत उदाहरण ठरली आहे.