पोटदुखीनं असह्य वेदना; डॉक्टरांना एक्स रेमध्ये सोन्याचं बिस्किट दिसलं अन् अजब घटनेचा उलगडा.

सध्या सोनं वाढत्या दरांमुळे चर्चेत असताना चीनमध्ये मात्र एका अजब घटनेमुळे सोनं चर्चेत आलं आहे. ११ वर्षीय मुलाच्या पोटात प्रचंड वेदना सुरु झाल्या. त्याच्या आई, वडिलांनी त्याला उपचारांसाठी रुग्णालयात नेलं.बीजिंग: सध्या सोनं वाढत्या दरांमुळे चर्चेत असताना चीनमध्ये मात्र एका अजब घटनेमुळे सोनं चर्चेत आलं आहे. ११ वर्षीय मुलाच्या पोटात प्रचंड वेदना सुरु झाल्या. त्याच्या आई, वडिलांनी त्याला उपचारांसाठी रुग्णालयात नेलं. त्याला वेदनाशामक औषधं देण्यात आली. पण तरीही पोटदुखी थांबली नाही. अखेर डॉक्टरांनी पोटाचा एक्स रे काढला. तेव्हा त्यांना आतमध्ये एक आयातकृती वस्तू दिसली. डॉक्टरांनी शस्त्रक्रिया करुन ती वस्तू बाहेर काढली. ११ वर्षांच्या मुलानं सोन्याचं बिस्किट गिळलं होतं. त्यामुळे त्यांच्या पोटात यातना सुरु होत्या. सध्या ही घटना चर्चेचा विषय ठरत आहे.

११ वर्षांच्या क्यूयननं खेळता खेळता १०० ग्रॅमचं सोन्याचं बिस्किट तोंडात टाकलं. पुढच्या काही क्षणांमध्ये त्यानं ते गिळलं. त्यानंतर त्याला पोटदुखीचा त्रास सुरु झाला. जियांग्सू प्रांतातील सुझोऊमधील वैद्यकीय केंद्रात क्यूयनवर उपचार सुरु झाले. डॉक्टरांनी शस्त्रक्रिया करुन क्यूयनच्या पोटातील सोन्याचं बिस्किट बाहेर काढलं. सोन्याचं बिस्किट गिळल्यानंतर क्यूयनचं पोट काही प्रमाणात सुजलं. बाकी त्याला कोणताही त्रास होत नव्हता.क्यूयनचे आई, वडील त्याला तातडीनं सुझोऊ विद्यापीठाशी संलग्न असलेल्या लहान मुलांच्या रुग्णालयात घेऊन गेले. तिथे त्याची तपासणी करण्यात आली. क्यूयनच्या आतड्यांमध्ये जास्त घनतेच्या धातूची वस्तू असल्याचं एक्स रेमधून समजलं. सुरुवातीला डॉक्टरांनी क्यूयनची पोटदुखी कमी करण्यासाठी औषधं दिली. अतिसार व्हावा आणि पोटातील वस्तू नैसर्गिक विधी करताना बाहेर यावी यासाठी डॉक्टरांनी प्रयत्न केले.यानंतर दोन दिवसांनी पुन्हा एकदा एक्स रे काढण्यात आला. धातूची ती वस्तू त्यात पुन्हा एकदा स्पष्टपणे दिसली. त्या वस्तूमुळे आतड्यांना धोका असल्यानं डॉक्टरांनी शस्त्रक्रिया करण्याचा निर्णय घेतला. एन्डोस्कोपीच्या माध्यमातून धातूची वस्तू बाहेर काढण्यात आली. त्यासाठी दोन डॉक्टरांनी अर्धा तास शस्त्रक्रिया केली.शस्त्रक्रियेनंतर दोन दिवसांनी क्यूयननं साधा आहार सुरु केला. तो आधीप्रमाणे जेवू लागला. यानंतर त्याला रुग्णालयातून डिस्चार्ज मिळाला. या घटनेची चिनी सोशल मीडियावर बरीच चर्चा झाली. यावर अनेकांनी काहीशा विनोदी प्रतिक्रिया दिल्या. ‘त्याला तो चॉकलेट बार वाटला का?’, असा सवाल एकानं विचारला. तर दुसऱ्या इंटरनेट वापरकर्त्यानं ‘त्यानं तो गोल्ड बार कसा गिळला? तो बऱ्यापैकी मोठा आणि कडक आहे. मला तर औषधाच्या गोळ्या गिळतानाही त्रास होता’, अशी प्रतिक्रिया दिली आहे.