Rajendra Nikam
जळगावात भीषण अपघात: पाचव्या मजल्यावरून कोसळून तरुण मजुराचा मृत्यू; सुरक्षेचा प्रश्न ऐरणीवर.
जळगाव शहरात एक अत्यंत हृदयद्रावक घटना समोर आली आहे. मास्टर कॉलनीतील शेरा चौक परिसरात इमारतीचे बांधकाम सुरू असताना, पाचव्या मजल्यावरून तोल गेल्याने मुकेश गोकुळ सोनार (३२) या तरुण मजुराचा जागीच मृत्यू झाला. या घटनेमुळे संपूर्ण परिसरात हळहळ व्यक्त केली जात असून, सोनार कुटुंबावर दुःखाचा डोंगर कोसळला आहे.
मिळालेल्या माहितीनुसार, सोमवारी सायंकाळी मुकेश सोनार हे पाचव्या मजल्यावर नेहमीप्रमाणे काम करत होते. दरम्यान, बांधकामाचा एक भाग अचानक धसल्याने त्यांचा तोल सुटला आणि ते थेट जमिनीवर कोसळले. या भीषण अपघातात त्यांच्या डोक्याला आणि शरीराला गंभीर दुखापत झाली. परिसरातील नागरिकांनी त्यांना तातडीने जिल्हा शासकीय वैद्यकीय महाविद्यालय व रुग्णालयात दाखल केले, परंतु डॉक्टरांनी त्यांना तपासून मृत घोषित केले.
सुरक्षेच्या उपाययोजनांचा अभाव?
या घटनेनंतर घटनास्थळी मजुरांच्या सुरक्षिततेबाबत गंभीर प्रश्न उपस्थित होत आहेत. पाचव्या मजल्यावर काम करताना मजुरांना सेफ्टी बेल्ट, हेल्मेट किंवा जाळी यांसारखी कोणतीही सुरक्षा साधने पुरवण्यात आली होती का? असा संतप्त सवाल नागरिक विचारत आहेत. बांधकामाचा भाग धसणे ही बाबही कामाच्या दर्जावर प्रश्नचिन्ह निर्माण करणारी आहे.
जळगाव पोलीस या प्रकरणाचा अधिक तपास करत असून, हलगर्जीपणा सिद्ध झाल्यास संबंधित ठेकेदारावर कारवाई होण्याची शक्यता आहे. मुकेश सोनार यांच्या पश्चात वृद्ध आई-वडील आणि कुटुंब असून, त्यांच्या निधनाने कुटुंबाचा आधार हरपला आहे.
