मुंबईत आता ‘मेट्रो-२ ब’च्या रूपात नवी मार्गिका सुरू करण्यासाठीची तयारी गाडी चाचणीच्या निमित्ताने होत आहे.जवळपास अडीच वर्षांनी नवीन उन्नत मेट्रो मार्गिका ‘मेट्रो-२ ब’ (पिवळी मार्गिका) मुंबईकरांच्या सेवेसाठी सज्ज झाली आहे. त्यानिमित्ताने या मार्गिकेतील गाडीची पहिली चाचणी बुधवार, १६ एप्रिलला होत आहे. मुंबई महानगर प्रदेश विकास प्राधिकरणाकडून (एमएमआरडीए) ही मार्गिका बांधली जात आहे. मुंबईकरांसाठी सध्या चार मेट्रो मार्गिका कार्यरत आहेत. त्यातील तीन (मेट्रो १, मेट्रो २ अ व मेट्रो ७) उन्नत आहेत. यापैकी ‘मेट्रो-२ अ’ व ‘मेट्रो-७’चा अखेरचा टप्पा १९ जानेवारी २०२३ रोजी कार्यान्वित झाला होता. त्यानंतर आता ‘मेट्रो-२ ब’च्या रूपात नवी मार्गिका सुरू करण्यासाठीची तयारी गाडी चाचणीच्या निमित्ताने होत आहे.

‘या मार्गिकेसाठी सहा डब्यांची अत्याधुनिक पद्धतीची गाडी आहे. ती अपेक्षित असलेला वेग घेते का? त्यासाठी आवश्यक तितका वीजपुरवठा होतो का? तसेच गाडीशी निगडित सर्व प्रणाली कार्य करीत आहेत का? याची तपासणी याचाचणीदरम्यान केली जाईल’, अशी माहिती ‘एमएमआरडीए’तील सूत्रांनी दिली.‘मेट्रो-२ ब’चा डेपो मंडाळा येथे असून तिथेच पहिले स्थानक आहे. त्यानुसार ही चाचणी मंडाळा डेपो ते चेंबूर येथील डायमंड गार्डन, अशा पाच स्थानकांदरम्यान ताशी ८० किमीच्या वेगाने होणार आहे.

यासाठी ‘एमएमआरडीए’ने केंद्र सरकारी भारत अर्थमुव्हर्स लिमिटेड (बीईएमएल) यांच्याकडून डबे खरेदी केले आहेत.‘एमएमआरडीए’अंतर्गत कार्यान्वित असलेल्या उभ्या होणाऱ्या व सध्या बांधकामाधीन असलेल्या सर्व मार्गिकांसाठी एकत्रितपणे या डब्यांची खरेदी करण्यात आली आहे. त्यामुळे हे डबे ‘मेट्रो-२ अ’ व ‘मेट्रो-७’प्रमाणेच आहेत; मात्र ही पिवळी मार्गिका असल्याने गाडीचा रंग पिवळा असेल.