Rajendra Nikam
एका महिलेने आपल्या वर्षभराच्या मुलाला पाण्याच्या टाकीत टाकून त्याचा जीव घेतला. सासू सुनेच्या भांडणात या चिमुकल्याला आपला जीव गमवावा लागला आहे. सासू, सुनेच्या भांडणात अवघ्या १ वर्षीय बालकाला जीव गमवावा लागल्याची धक्कादायक घटना येथील शहापूर तालुक्यातील कासणे गावात घडली आहे. घरगुती भांडणातून जन्मदात्या आईनेच पोटच्या मुलाला पाण्याने भरलेल्या टाकीत बुडवून ठार मारल्याने आई अपेक्षा भोई (वय २२) हिच्या विरोधात पडघा पोलीस ठाण्यात भारतीय न्याय संहिता कलमानुसार खुनाचा गुन्हा दाखल करून पोलिसांनी आईला अटक केली आहे. पार्थ असे हत्या झालेल्या बाळाचे नाव आहे. सूत्राने दिलेल्या माहितीनुसार, भिवंडी तालुक्यातील पडघा पोलीस ठाण्याच्या हद्दीत कासणे गावात भोई यांचे कुटुंब राहते. संदेश यांचा विवाह २०२२ मध्ये अपेक्षा हिच्याशी झाला होता आणि आरोपी अपेक्षा आणि संदेश या दाम्पत्याला वर्षभरापूर्वी पार्थ झाला होता. परंतु त्याला जन्मतःच ह्रदयविकार असल्याने त्याच्यावर मुंबईतील वाडिया रुग्णालयात उपचार सुरु होते. आजारी मुलगा जन्माला घातला यावरुन अपेक्षा आणि तिच्या सासू यांच्यात नेहमीच खटके उडत होते. तर, दुसरीकडे मृत मुलगा मीच सांभाळ करून या मुलावर माझाही हक्क असल्यानं सासू सुनेत नेहमीच घरात वाद होत होते.
